Artikkel fra Hallingdølen 18 april 2022 

Heidi Sire (t.h.) og Siv B. Kjønaas starta det private sjukepleieføretaket AktivSykepleie i 2021. Så langt har reisa vore lærerik. Foto: Anna Huseby

Bak firmaet står dei to sjukepleiarane Heidi Sire og Siv Bragstad Kjønaas. Begge har lang erfaring frå det offentlege helsevesenet, og jobbar framleis ved legevakta og miljøterapitenesta. Satsinga på sitt eige private sjukepleieføretak kjem i tillegg:

- Nokre gonger skjønar eg ikkje heilt korleis me har klart det, ler Siv B. Kjønaas.

Eit supplement til det offentlege

Å starte sitt eige firma er nemleg ikkje beint fram. For Kjønaas og Sire var det heilt nødvendig å halde på jobbane sine medan dei satsa for seg sjølve. Dei har latt vere å ta opp store lån, og har gjort innkjøp og investeringar stegvis. Løn har dei enno ikkje henta ut frå firmaet:

- Me har investert i utstyr og marknadsføring, og vil ha ein god buffer på plass først, seier Heidi Sire. Men pasientane har kome ein etter ein sidan oppstarten i september. AktivSykepleie tilbyr alt frå medisinsk hudpleie til sårskift, fjerning av sting og samtaleterapi, for å nemne noko.

- Tanken har aldri vore at me skal «ta» pasientar for det offentlege. Men me såg at mange opplever ein del ventetid, og det er turistar i Hallingdal utan fastlege her. Me kan vere eit supplement, og merker at det behovet er der, seier Sire.

Tidsbruk og marknadsføring

For å starte eit privat sjukepleieføretak måtte dei først finne ein fagleg ansvarleg lege. Då dette var på plass gjekk dei gang med å etablere eit aksjeselskap. Tidsbruken har vore den største overraskinga i oppstartsfasen:

- Berre det å bli registrert i Brønnøysund tok lang tid, fordi det var kø. Me følte oss klare til å starte alt i april/mai, men måtte vente ei god stund på organisasjonsnummer, seier Heidi Sire. Vidare er begge to samde om at marknadsføring har vore noko av det mest utfordrande.

- Kor skal ein annonsere, og korleis skal ein treffe den rette målgruppa? Me har mellom anna stått på gata og delt ut brosjyrar i kulda, fortel dei. Begge kunne tenke seg eit breiare tilbod av kurs og informasjon som går konkret på marknadsføring. Nettside, sosiale medier og annonsering er mykje å halde styr på når ein i tillegg skal møte pasientar og har ein annan jobb ved sida av.

- Marknadsføring er ein krevjande jobb, og det kostar, seier Kjønaas.

Heidi Sire (t.h.) og Siv B. Kjønaas starta det private sjukepleieføretaket AktivSykepleie i 2021. Etter nokre månader delvis på flyttefot, held dei no til i lokala til Ingrids Naturterapi på Geilo. Foto: Anna Huseby

Drøymer om å utvide

Dei to sjukepleiarane er samde om at vegen blir til medan ein går. Ofte går ein inn i satsinga med ein klar tanke for kva som skal gjerast:

- Men så ser du etter kvart at rammene flyt litt utover, og kanskje behova var noko annleis enn du først tenkte?, seier Sire. Kjønaas meiner det er lurt å tenkje seg godt om før ein tek spranget:

- Det heile startar med ein draum, og den kan du absolutt følgje. Men det er mykje å kartleggje og setje seg inn i, fortel ho. På sikt håpar dei at AktivSykepleie kan bli ein fulltidsjobb for begge to:

- Me drøymer om å utvide, men då må me også ha ein lege som jobbar fast i firmaet. Enn så lenge handlar det om å lande trygt og bli godt kjent, seier Kjønaas.

Råka av nedstenging i vinter

Heidi Sire i AktivSykepleie er samd i pandemien har vore både ei utfordring og ein døropnar:

- Det negative var at me ikkje fekk noko særleg ut av turismen i vinter. Smittetala gjekk opp, folk vart heime og mykje var stengd. Samstundes ser me at legekontora har måtte jobbe mykje med korona, testing og smittesporing. Dei har kanskje måtte nedprioritere nokre pasientar som dei elles kunne tatt imot, og dei har i staden for kome til oss.